Europako Parlamentuaren Osoko Bilkurak, gaur bertan, asteazkena, EAJ-PNVren laguntzarekin, babes-mekanismo berri bat eman du. Mekanismo horri esker, bloke bien arteko balizko akordio batean merkatuko nahasmendua ematen den kasuetan, aldi baterako eten ahal izango dira Mercosurrek barne hartzen dituen herrialdeetatik (Argentina, Brasil, Paraguai eta Uruguai) datozen nekazaritza-inportazioen gaineko lehentasunezko zergak. Tresna berriaren helburua da EBri neurriak ematea Europako nekazaritza-sektorea azkar eta erraz babesteko, prezioen jaitsieren edo inportazioen ustekabeko igoeren aurrean.
"Derrigorrezkoa da nekazaritza-sektoreak adierazi dituen kezkei erantzutea, beharrezkoak diren laguntza-neurrien bidez. Tresna berriari esker, ikerketak azkarrago atera ahal izango dira, baldin eta EBn prezioen jaitsiera-frogak badaude edo inportazioen gorakada handia ematen bada. Horrek erakusten du lehen sektoreari entzuten diogula eta behar diren neurriak hartuko direla hura babesteko behar izanez gero", baloratu du eurodiputatu jeltzale eta Mercosurrekiko harremanetarako Europako Parlamentuaren ordezkaritzako presidenteordeak bitarteko merkataritza-akordioaren (EB-Mercosur) eta Elkartze Akordioaren (biak onartzeke daude) zati den mekanismoaz.
Erregelamenduan aurreikusitako babes-neurriak, orain Kontseiluarekin negoziatu beharko direnak, Europako Batzordeak sektorearen beldurrei erantzuteko diseinatutako aterkiaren parte dira, bai eta akordioari uko egiten dioten EBko herrialdeenak ere. Zaintzak eta ikerketa-epe laburragoak aktibatzeko atalase zorrotzagoez gain, Europako Parlamentuak produktu sentikorren inportazioen aldizkako ikuskapena defendatzen du, hala nola behi- edo hegazti-haragia.
Esate baterako, Europako Batzordeak babes-neurrien beharrari buruzko ikerketa egin beharko du nekazaritza-produktu sentikorren inportazioak batez beste % 5 handitzen direnean, Batzordearen jatorrizko proposamenean aurreikusitako urteko % 10aren aldean, eta ikerketen epea 6 hilabetetik 3 hilabetera murriztuko da oro har, eta 4tik 2ra produktu sentikorren kasuan.
Europar Batasunak eta Mercosurreko herrialdeek akordio politiko bat sinatu zuten 2024ko abenduan, planetako eskualde arteko merkataritza libreko eremurik handiena sortzeko, 740 milioi kontsumitzaile baino gehiago barne hartuta. Europako Batzordeak joan den irailean aurkeztu zituen onarpen formaleko prozesua irekitzeko testuak, akordioa urte amaiera baino lehen sinatzeko helburuarekin.
"Aliantzak egin behar ditugu, gure industriarentzat aukera berriak eta herrialde berriak lortzeko, enplegu berriak mantentzen eta sortzen laguntzeko, gure ongizaterako funtsezkoa den nekazaritzako elikagaien sektorea ahaztu gabe. Babes-mekanismo hori babes-sare bat da. Gakoa orekan dago. Akordioa merkataritza-akordio soil bat baino askoz haratago doa, eta ez ditugu ahaztu behar Euskadik Argentinarekin edo Uruguairekin dituen lotura historikoak", gogorarazi du Agirregoitiak.
