Kongresuko Euskal Taldeko bozeramaile Maribel Vaquerok gaur kritikatu du Felipe VI.ak Gabon gaueko ohiko diskurtsoan Trantsizioa goraipatu izana, historiaren garai hori nola sortu zen aipatu gabe: “50 urte igaro dira Franco hil zenetik, eta gogoratu dezagun ohean hil zela haren aita estatuburu izendatu ondoren. Eta oraindik argi-ilun eta ilun ugari geratzen dira ezagutzeko”, esanez hasi du Donostiako Gipuzkoa Plazatik egin duen balorazioa.
“EAJ-PNVtik hainbatetan eskatu dugu dokumentu guztiak desklasifikatzea, egia ezagutzeko eta sekretuen lege berri bat egon dadin, dagoenak eragotzi egiten duelako diktaduraren amaierako eta Trantsizioko gertakariak ezagutzea. Eta demokrazia batek, balioa izan dezan, elkarrizketa eta erakundeak bezain garrantzitsua da egia ezagutzea, hain gertakari larriak berriro gerta ez daitezen”. “Edozein demokraziaren zutabeetako bat da egia ezagutzea”, berretsi du sekretuen egungo legea Francok 1968. urtean onartu zuela gogoratu baino lehen.
Bozeramaile jeltzaleak ildo beretik nabarmendu du Felipe VI.ak atzoko diskurtsoan esan gabe utzi zuen zerbait. “Ez da hitzik esan euskal nazioa edo kataluniar nazioa aitortzeko, “ohiko kontua den zerbait,” baina, “gauza guztien gainetik”, Vaquerok erregeari deitoratu dio elkarbizitzaz hitz egin izana baina euskara defendatzeko minutu bakar bat ere dedikatu ez izana. “Herri gisa, gure hizkuntzak asko axola digu, eta urte osoan zehar euskarak jasan dituen erasoen aurrean, oso larriak izan direla kontuan izanik, erreferentziaren bat egitea nahiko genukeen”.
