"Gidabaimena eguneratuta izatea Espainian edozein ibilgailu mota gidatzen duten herritarren betebeharra da, eta gidabaimena berritzea titularren erantzukizuna da. Gidabaimena berritzen denean, Trafikoko Zuzendaritza Nagusiak behin-behineko baimena ematen du gidabaimen berritua eman arte, baina behin-behineko dokumentuak Estatuko errepideetan baino ez du balio, ez du inolako baliorik Estatuko mugetatik kanpo", salatu du Nerea Renteria diputatu jeltzaleak Espainiako Gobernuari gaur bertan, asteartearekin, Kongresuan erregistratu dituen galderetan. Arazo horrek "kalteberatasun-egoeran uzten ditu muga-eremuetako gidariak, hala nola Euskal Autonomia Erkidegokoak edo Nafarroako Foru Erkidegokoak, isuna jaso baitezakete Frantzian zirkulatzean", bereziki "egunero muga zeharkatzen duten profesionalak, lan-arrazoiengatik joan-etorriak egiteko".
Trafikoari, Ibilgailu Motordunen Zirkulazioari eta Bide Segurtasunari buruzko Legearen testu bategina onartzen duen urriaren 30eko 6/2015 Legegintzako Errege Dekretuak adierazten duen bezala, langile horiek iraungitako gidabaimenarekin gidatzen badute, "200 euroko zehapen larria" jaso lezakete, eta egoera horrek "ibilgailua ibilgetzea ere eragin lezake".
Diputatu jeltzaleak azaldu duenez, "gidabaimena berritzen denean, Trafikoko Zuzendaritza Nagusiak behin-behineko baimena ematen du berritutako baimena eman arte, baina behin-behineko dokumentuak Estatuko errepideetan baino ez du balio, ez du inolako baliorik Estatuko mugetatik kanpo", eta Diruaren eta Zerga-zigiluaren Fabrika Nazionalak "batez beste hiru hilabete" emateko epea bikoiztu izana kritikatu du. Renteriak adierazi duenez, "nazioarteko gidabaimena ez da irtenbide bat, Europar Batasunetik kanpoko lurraldean baino ez baitu balio", eta ez luke balioko "Frantziako lurraldean, indarrean dagoen gidabaimen fisikoarekin batera aurkezten ez bada".
Nerea Renteria diputatu jeltzaleak Espainiako Gobernuari aurpegiratu dio Euskal Autonomia Erkidegoan eta Nafarroako Foru Erkidegoan gidabaimenak berritzeko atzerapenak konpontzeko neurriak ez hartzea. Halaber, jakin nahi du zenbat pertsonari eragiten dien arazo horrek lurralde horietan, eta zer konpentsazio aurreikusten dituen Frantziako lurraldean zirkulatu ezin duten edo isunei aurre egin behar dieten profesionalentzat.
Esteka honetan, Nerea Renteria Euskal Taldeko diputatuak erregistratutako galderak ikus daitezke: https://labur.eus/mztcukze
